Средствата наменети за антикризните мерки предизвикаа скандал во бугарскoтo собрание за време на денешната седница. По ескалација на состојбата, а поради претходни тензии, претставниците од Бугарската социјалистичка партија излегоа од пленарната сала, информираат локалните медиуми.
Бугарските социјалисти уште еднаш побараа оставка од владата на мнозинската партија ГЕРБ и рекоа дека не се согласуваат со социо-економските мерки преземени поради коронавирусот. Пратениците во законодавниот дом побараа и точен извештај за трошењето на парите, како и бројките да бидат објаснети лично од страна на премиерот Бојко Борисов.
Лидерот на БСП, Корнелија Нинова, го повика Борисов да дојде во салата и со бројки да објасни за што станува збор и да се соочи со прашањата на опозицијата, а за кои јавноста сака да чуе.
Неколку минути подоцна пратеникот Георѓи Свиленски директно побара владата да си даде оставка. А Филип Попов од БСП рече дека точките се веќе исцрпени и дека нема што понатаму да се зборува.
Во соседна Бугарија денес ќе продолжат антивладините протести на улиците во главниот град на државата, јавија бугарските медиуми.