Лидерот на Демократската партија – Сали Бериша на денешната прес-конференција изјави дека албанскиот премиер Еди Рама, ќе добие „лекција од граѓаните за време на масовниот протест што опозицијата ќе го одржи утревечер пред Владата”.
-Ќе и одржиме лекцијата на Владата каква што заслужува, така ќе го опишам протестот. Граѓаните ќе ѝ одржат силна лекција на владата. Нека остане во канцеларија. Тоа е она што го велам, остани таму. Ѕидовите ги блиндиравте, ги запечативте вратите, влези и остани внатре, ако си маж, рече Бериша.
Додаде дека „Рама е во црвен круг” и оти опозицијата и граѓаните ќе го соборат.
-Престанавме да соработуваме со нарко-мнозинството, ние опозициските сили ќе формираме комисии за територијална и изборна реформа. Ќе ја спроведеме вистинската реформа, нагласи Бериша.
Неговата партија во парламентот има 50 од вкупно 140 пратенички места.
Протестот е поддржан и од Партијата на слободата на Илир Мета, кој е во затворски притвор, а почнува во 17 часот пред владата во Тирана.