Генералниот секретар на ОН Бан Ки-мун допатува денеска од Скопје во дводневна посета на БиХ, која е последна станица во неговата повеќедневна турнеја низ земјите од Југоисточна Европа.
Според протоколот на посетата, планирано е Бан веднаш по пристигнувањето во Сараево да се сретне со претседавачот со Претседателството на БиХ Бакир Изетбеговиќ и членовите на Претседателството на БиХ Небојша Радмановиќ и Жељко Комшиќ.
Планирана е средба и со членовите на колегиумот на двата дома на Парламентарното собрание на БиХ, како и со претседавачот со Советот на министри на БиХ Вјекослав Беванда и неговиот заменик, босанскиот министер за надворешни работи Златко Лагумџија.
Генералниот секретар на ОН со официјалните претставници на БиХ ќе разговара за актуелната политичка ситуација во земјата, европскиот пат на БиХ и соработката во регионот.