Суспендираната обвинителка на ЕУЛЕКС Марија Бамие изјави дека уште во 2012 година почнала да се сомнева дека во мисијата се случуваат работи, кои укажувале на корупција.
Бамие нагласи дека за се го информирала официјален Брисел, но истрага не била покрената, туку напротив било сторено се за да не се истражат нејзините тврдења.
– Се жалев во Брисел. Да, го сторив тоа но тие ме игнорираа. Офицерот на канцеларијата на цивилниот командант во Брисел во 2012 година беше и шеф на персоналот и тој беше запознат со моите сознанија за корупција, но не стори ништо, рече Бамие во интервју за РТК2.
Иако секојдневно од ЕУЛЕКС истекуваа доверливи информации, таа смета дека е неправедно поврзана со сето тоа, бидејќи таа не ги оддавала доверливите информации, а на јавноста и се обратила за да се одбрани од тие тврдења.
– Јас сум суспендирана без ниту еден факт дека сум оддала каква било информација. Мојот шеф имаше пристап до доверливите документи, информациите истекоа, а истрагата не е спроведена, додаде таа.
Бамие тврди дека одредени припадници на ЕУЛЕКС имале блиска соработка со политичката елита на Косово, а според неа информации им се давани и на српските тајни служби.