На реката Струма, во близина на селото Пастух во општина Невестино (Бугарија), се случи трагедија во која животот го загубија баба и дедо, додека потрагата по две деца, на возраст од околу 10 години, сè уште трае.
Според информациите потврдени од полицијата за бугарскиот портал „NOVA“, се претпоставува дека семејството беше на излет кога се случи несреќата.
Според регионалниот гувернер на Ќустендил, Атанас Гергинов, двете внучиња почнаа да се дават, по што бабата и дедото скокнаа во реката во обид да ги спасат. Нивните тела се пронајдени во реката.
Местото каде што престојуваше семејството е означено како камп, а според Гергинов, реката во тој дел е длабока меѓу осум и десет метри, што дополнително ја отежнува операцијата за спасување.
Со семејството имаше и трето дете, на возраст од околу шест години, роднина на исчезнатите момчиња. Тоа е пронајдено неповредено и во добра здравствена состојба.
Во потрагата по исчезнатите деца учествуваат припадници на полицијата, противпожарните и спасувачките служби, како и бројни доброволци, а во акцијата се вклучени и дронови кои го пребаруваат теренот.
„Обезбедено е сè што е потребно, а полицијата и пожарникарите се на терен. Имаме добра организација“, изјави Гергинов.
Потрагата по двете деца продолжува.