Десетици училишта во хрватските градови добија закани за бомби, кои полицијата ги прогласи за лажни. Според последните објавени информации, Европол се вклучил во истрагата од каде дошле заканите за бомби.
Да потсетиме дека слични инциденти се забележани и во други европски земји. Само на 27 јануари 230 училишта во Словенија добиле слични закани, додека на 23 јануари дури 270 училишта во соседните земји добиле закани.
Заканувачките мејлови содржат исламистички пораки и најави за одмазда, но полицијата нагласува дека нема причина за паника.
Надлежните органи постапуваат по утврдени протоколи – сите училишта се евакуирани, просториите се детално проверени, а безбедносните мерки се на највисоко ниво. Истрагата на полицијата продолжува за утврдување на изворот на заканите и спречување слични инциденти во иднина.
Хрватскиот премиер Андреј Пленковиќ за медиумите изјави дека досега се проверени 50 од 85 училишта и дека сите извештаи се покажале лажни.