Градоначалникот на општина Битола Владимир Талески денеска на предновогодишна средба со новинарите ја соопшти програмата за дочек на Нова Година која традиционално локалната самоуправа ја организира на плоштадот „Магнолија“.
– За изборот на ѕвездите од македонската естрада најголемо влијание извршиле младите битолчани, но и другите сограѓани од сите генерации кои не пропуштаат највеселата ноќ и дочекот на новата година да го прослават на плоштадот во Битола, посочи Талески.
Битолчани ќе бидат заедно со најпопуларните и најбараните, со Владо Јаневски, Влатко Лозановски, Димитар Андоновски и Виктор Апостоловски, но и со групите „Фолтин“, „Силви Бенд“ и „Боеми“. Музика за сечиј вкус ќе понудат и групата „Баклава“, Нико, „Памперс“ и Сефедин Бајрамов, но и други познати имиња.
Општинската новогодишна програма ќе почне на 29. декември со избрани содржини за децата, ќе продолжи наредниот ден со детски театарски претстави и настап на комичарот Марјан Ѓоргиевски, а на 31 декември забавната програма ќе се одвива од 11 часот до 2 часот по полноќ.
Традиционално, на 1 јануари градоначалникот Владимир Талески на првите новородени жители на општина Битола ќе им врачи пригодни подароци во одделението за неонатологија при Клиничка Болница во овој град.