Можете ли да замислите реалност, во која хетеросексуалците се маргинализирани во општеството, а хомосексуалноста отворено се поддржува? Краткиот филм „Love Is All You Need?“ ( „Љубовта е се што ти е потребно?“), кој е снимен минатата година, прикажува таков имагинарен свет каде доминираат хомосексуалните семејства, додека хетеросексуалноста се смета за „болест“.
Главен јунак е стрејт девојче, кое живее во опкружување каде сите останати се геј. Кога во училиштето ќе се обиде да фати за рака едно момче, неговиот брат и другите деца ја тепаат.
Авторите на филмот наведуваат дека основната порака е дека љубовта може да го промени светот и да ја прекине дискриминацијата заради која страдаат голем број недолжни луѓе, пренесува Блиц.
„Овој филм е посветен на секое дете кое влегло во темнина заради туѓата омраза и неразбирање. Никогаш не би требало да се чувствувате лошо или осамено заради тоа што сте… единствени“, гласи пораката на крајот на филмот.
Остварувањето обработува и други важни теми, како што се врсничкото малтретирање и самоубиство, а вреди да се види и поради искрената глума и силните емоции со кои сцените изобилуваат.