Јужнокорејската компанија Самсунг во Барселона ги претстави новите Галакси С6 и С6 Едџ, што на пазарот ќе се најдат на 10 април годинава.
Самсунг на „Ворлд мобајл конгрес“ во Барселона го претстави новиот смартфон Галакси С6 со метално куќиште и Горила глас на предната и задната страна на уредот.
Новиот Галакси С6 е еден од најтенките уреди на пазарот со дебелина од само 6,8 милиметри и поседува заоблени рабови. За разлика од претходникот, новиот уред нема отвор за микроСД картичка и можност за замена на батеријата.
Галакси С6 работи на 64-битен Ексинокс процесор, а поседува и три гигабајти РАМ меморија. Внатрешната меморија ќе зависи од цената и ќе изнесува 32, 64 или 128 гигабајти. Екранот е КуХД од 5,1 инч и Супер АМОЛЕД технологија, а во однос на Галакси С5 има и до 77 проценти повеќе пиксели по инч.
Самсунг со најновиот Галакси уред претстави и безжично полнење, како и нова технологија за брзо полнење на уредот, што за десет минути може да го наполни телефонот за четири часа нормално користење.
Камерата на задниот дел е 16 мегапикселна со ХДР технологија. Галакси С6 има и паметен читач на прсти на предната страна за отворање на почетниот екран.
Самсунг го претстави и Галакси С6 Едџ, што во однос на Галакси С6 нема подобри перформанси, освен екран што е заоблен на рабовите. Двата уреди на пазарот ќе бидат достапни по 10 април, а цените се уште не се познати.