Соединетите Американски Држави денес објавија втора серија претходно класифицирани документи за наводни видувања на неидентификувани летачки објекти (НЛО). Документите содржат изјави од луѓе кои пријавиле необјаснети зелени сфери, дискови и огнени топки, објави Скај њуз.Првата серија документи беше објавена претходно овој месец, на 8 мај.
Министерот за одбрана на САД, Пит Хегсет, изјави дека документите, фотографиите и видеата од она што официјално се нарекуваат „неидентификувани необјаснети феномени“ со години поттикнуваат шпекулации.
„Време е американскиот народ да го види тоа со свои очи“, рече тој во соопштението.
Објавените материјали вклучуваат видео снимки добиени со инфрацрвени сензори, извештај на Централната разузнавачка агенција за наводно видување на беспилотно летало (UAP) во поранешниот Советски Сојуз, како и сведоштво на лице кое тврди дека доживеало од прва рака инцидент поврзан со неидентификуван објект.
🚨 Here is a thread of all of the UAP / UFO videos released today by the Department of War. pic.twitter.com/4lGe9HLO15
— John Greenewald, Jr. (@theblackvault) May 22, 2026
Една од објавените фотографии покажува објект следен од сензорскиот систем над површината на водата, додека други слики покажуваат формации на непознати објекти со траги на небото.
Трамп изјави на социјалната мрежа Truth Social дека неговата администрација ќе продолжи да објавува нови материјали.
„Поради огромниот јавен интерес, ќе им наложам на Министерството за одбрана и на другите релевантни агенции да го започнат процесот на идентификување и објавување на владини досиеја поврзани со вонземски живот, беспилотни летала (UAP) и НЛО“, рече Трамп.
Американските власти истакнуваат дека станува збор за „нерешени случаи“, односно инциденти за кои владата не била во можност да даде дефинитивно објаснување поради недостаток на податоци или други ограничувања.
Сепак, експертите кои ја анализирале првата серија објавени документи велат дека, и покрај новите видеа и извештаи, сè уште нема убедливи докази што би го потврдиле постоењето на вонземска технологија или интелигентен живот надвор од Земјата.
До денес се објавени вкупно 222 документи.