Сограѓаните одамна знаат дека протојереј Предраг Исаески од Тетово има дарба за уметност по која се издвојува од другите свештеници на Македонската православна црква – Охридска Архиепископија.
Тој со децении е член на литературниот клуб „Кирил Пејчиновиќ“ од градот и има издадено повеќе збирки поезија, а највпечатлив дел од неговиот опус се песните со љубовна тематика.
Но, неговите музички, поточно пејачки способности, досега беа непознати за пошироката македонска јавност. Во снимка објавена вчера, отец Предраг се претставува со сјајна изведба на староградската класика „Кажи, кажи либе Стано,“ на која можат да му позавидат и многу професионални пејачи – што и не е чудно, затоа што пеењето е важен дел од свештеничката професија.
Распеаниот отец во своето слободно време ги следи сите спортски случувања, а познат е и како одличен играч на спортска прогноза, со „стаж“ уште од времето на Југославија. Неговите сограѓани коментираат дека во овие тешки времиња, пејачките бравури на отец Предраг воопшто не се лош начин на кој еден свештеник може да го подигне духот на народот.