107 филмови во 11 дена, од 15-ти до 25 ноември, ќе понуди годинашниот Фестивал на европскиот филм „Синедејс“, со проекции во кината „Милениум“, „Фросина“ и во Кинотеката на Македонија.
Десет наслови од млади европски автори се во официјалната конкуренција, седум во програмата Синебалкан, пет во селекцијата МК&ЕУ – европски филмови во кои учествуваат режисери, сценаристи, актери, продуценти од Македонија, и 40 гала-премиери (од Копола, Ханеке, Бертолучи, Вуди Ален, Том Тиквер, Кроненберг, …, победници во Кан, Венеција, Берлин, Сан Себастијан…) за 40-те години постоење на организаторот на фестивалот – Младинскиот културен центар.
Мотото годинава е „Да ја исплакнеме сапуницата од себе, помалку сапун, повеќе филм“. Директорот на МКЦ Златко Стевковски на прес-конференција рече дека слоганот е поради „опсадата од сапуници“ на националните телевизии кои, покрај вестите, 16 часа дневно прикажуваат серии.
– По четиридецениската безмилосна војна против сеопштиот кич, шунд, паланечката малограѓанштина, хипокризијата, ниските вредности, дребното профитерство, срозените морални нормативи, политиканството и останатите контракултурни, нехигиенски и несогледливо штетни општествени појави и дејанија, вашиот МКЦ ви приредува 107 филмови во 11 дена, рече Стевковски.
Идниот четврток фестивалот ќе почне во „Милениум“ со германско-унгарски филм од гала-премиерата „Вратата“, а во вечерниот термин официјалното отворање е со словенечкиот „Шангајски циган“ во која главниот лик го игра македонскиот актер Висар Вишка. Овој филм е во селекцијата МК&ЕУ, како и филмот за затворање – „Кога ќе се раздени“ на српскиот режисер Горан Паскаљевиќ, во кој играат Зафир Хаџиманов и Мето Јовановски и музика на Влатко Стефановски. Во оваа програма е и српскиот „Ѕвезрилник“ со Никола Ристановски во главна улога.
На годинашниот „Синедејс“ се филмови победници или номинирани на филмските фестивали, меѓу кои победниците во Сараево и во Ротердам – романскиот „Секој во нашето семејство“ и српскиот „Клип“.
Во програмата „Земја во фокусот“ оваа година е кинематографијата на Египет и ќе бидат прикажани документарни филмови за Арапската пролет. Нивни селектор е Шериф Авад, филмски уредник на списанието Egypt Today, кој е и член на жирито за официјалната конкуренција. Во жирито се и македонскиот режисер Вардан Тозија и Јан Харлан – продуцент на филмовите на Стенли Кјубрик, кој е меѓу ѕвездите на „Синедејс“, заедно со Андреас Дресен, големото име на германската кинематографија.
Гости на фестивалот ќе бидат и Горан Паскаљевиќ, Маја Милош – режисерка на наградениот филм „Клип“, Ричард Грејсон од Универзитетот „Оксфорд“, кој ќе одржи предавање на тема „Холивудската културна машина“…
„Синедејс“ ќе има и неколку музички документарци, кратки филмови од македонската продукција, првпат и поетски филмови, остварувања на млади италијански режисери, како и придружни настани – работилници и концерти, меѓу кои на Тони Китановски и Черкези оркестарот за отворањето на 15-ти и настапот на „Беи д фиш“ на 24 ноември во МКЦ.
Буџетот за фестивалот е околу 1,5 милион денари обезбедени од Град Скопје, Министерството за култура и Делегацијата на ЕУ во Скопје. Стевковски рече дека тоа е многу мал дел од реалните организациски трошоци и дека финансиски фестивалот е покриен и од приходите во „Милениум“ и МКЦ.
Информираше дека од 44 продадени билети на „Синдејс“ во 2009 година, кога ја наследиле организацијата, во 2010 биле продадени 4.900, а лани 23.000 влезници. Очекува дека годинава бројот на глдеачи ќе биде уште поголем. Влезницата за секој филм е 100 денари. Проекциите во „Милениум“ ќе почнуваат од 12 часот.