Веста дека 35-годишна мајка на две деца починала откако испила две литри вода за 20 минути го обиколи светот. Се посомневала дека е дехидрирана, по што решила да ја задоволи жедта. Таа колабирала и никогаш не се освестила. Многумина се прашуваат како може да се случи вакво нешто, а експертите од американскиот Центар за контрола и превенција на болести (ЦДЦ) велат дека пиењето вода за кратко време може да биде смртоносно.
Два литри вода дневно се неопходни за одржување на хидрираноста на телото. Центрите за контрола и превенција на болести (ЦДЦ) советуваат дека никогаш не треба да се пијат повеќе од 1,4 литри вода или кој било друг пијалок за еден час. Во спротивно, може да се појави хипонатремија. Хипонатремија се јавува кога нивото на натриум во крвта паѓа на ненормално ниски нивоа, т.е. под 135 mEq/L. Натриумот е од витално значење за регулирање на количината на вода во телото и контролирање на крвниот притисок, нервите и мускулите.
Кога концентрацијата на електролитите не е во рамнотежа, вишокот вода предизвикува отекување на клетките на телото. Најопасно е ако се случи во мозокот, каде органот не може да отече поради черепот, пишува „Националната бубрежна фондација“. Ова може да резултира со кома. Симптомите на хипонатремија обично се благи и вклучуваат повраќање, главоболки, конфузија, замор, низок крвен притисок и мускулна слабост.
Според студиите, стапката на смртност кај оние кои завршуваат во болница поради хипонатремија е 25 проценти. Забележани се смртни случаи кај луѓе кои пиеле седум до осум литри вода дневно.