Поранешниот фудбалер на Барселона и поранешен сопруг на пејачката Шакира, Жерар Пике (38), наводно ја завршил тригодишната врска со својата 12 години помлада партнерка, Клара Чиа Марти.
Според списанието „Марка“, новинарката Адријана Доронсоро ја потврди веста за прекинот во емисијата „Vamos a ver“, нагласувајќи дека информациите се сè уште неофицијални.
„Имам информации дека Пике и Клара Чиа раскинале. Моментално ги истражувам можните причини за раскинувањето, бидејќи добивам информации за можна вмешаност на трето лице, иако засега ништо не е утврдено со сигурност“, рече Доронсоро.
Според шпекулациите, еден од настаните што ги поттикна гласините за разделбата беше неодамнешното појавување на Пике во слаткарница во Мајами, каде што беше виден во друштво на непозната црвенокоса жена. Поранешниот фудбалер, како што се пишува, често престојува помеѓу Барселона и Мајами, што исто така можело да влијае на отуѓувањето на двојката.
Пике ја запозна колумбиската пејачка Шакира во 2010 година за време на снимањето на видеото за нејзиниот хит „Waka Waka“, што беше официјалната песна на Светското првенство во фудбал. Нивната врска стана јавна во 2011 година, а заедно имаат два сина – првиот во 2013 година, а вториот во 2015 година.
По речиси една деценија заедно, двојката одеднаш објави дека се разделува во 2022 година, поради гласините за неверството на Пике. Набргу потоа, Пике започна врска со Клара Чиа Марти. Исто така, Шакира неодамна беше поврзана со актерот Лусиен Лависконт, познат по улогата во серијата „Емили во Париз“.