Акционата ѕвезда Чак Норис почина на 86-годишна возраст, објави неговото семејство во соопштение на социјалните мрежи.
Веста за смртта на легендарниот актер и мајстор на боречки вештини Чак Норис одекна во светската јавност, откако информацијата ја објави порталот TMZ, повикувајќи се на објава на неговото семејство на социјалните мрежи.
Според објавата споделена на неговиот официјален профил на Instagram, Норис починал вчера наутро, опкружен со своето семејство. Од семејството посочуваат дека станува збор за ненадејна загуба, а деталите околу околностите нема да бидат јавно споделени.
„Со тешко срце, нашето семејство ја споделува ненадејната смрт на нашиот сакан Чак Норис. Иако сакаме да ја задржиме приватноста, знајте дека тој беше во мир и опкружен со најблиските“, се наведува во објавата.
Во истото соопштение, семејството го опишува како човек кој оставил силен белег не само во филмската индустрија, туку и во животите на луѓето ширум светот.
„За светот тој беше мајстор на боречки вештини, актер и симбол на сила. За нас беше посветен сопруг, грижлив татко и дедо, неверојатен брат и срцето на нашето семејство. Со својата работа, дисциплина и добрина инспирираше милиони луѓе“, се додава во објавата.
Чак Норис важеше за една од најпрепознатливите личности во акционата филмска индустрија, а неговото наследство ќе остане запаметено преку бројните улоги и влијанието што го имаше врз генерации обожаватели.
Share