Секоја година во Србија од малигни болести заболуваат 350 деца на возраст до 19 години, а најчести се ембрионални тумори, леукемија, тумор на мозок и лимфоми.
– Нашата земја според зачестеност од заболување од малигни болести кај децата не се разликува многу од другите земји во регионот. Во Србија е регистриран пораст на стапката на заболување од овие болести, но она што е значајно е дека стапката на смртни случаи од рак кај децата се намалува, изјави епидемиологот на Институтот за јавно здравство на Србија „Д-р Милан Јовановиќ – Батут“, Снежана Живковиќ-Перишиќ.
По повод Меѓународниот ден на децата заболени од рак, кој се одбележува утре, 15 февруари, таа нагласи дека прогнозата за малигните болести зависи од возраста на децата и стадиумот на болеста.
– Брзата дијагностика и соодветната терапија овозможија петгодишното преживување на децата заболени од рак, денес да се зголеми за 30 отсто, истакна доктор Живковиќ-Перишиќ.