Во Македонија интернет користат 1.180.704 граѓани или 56,7 проценти од вкупната популација, а на социјалната мрежа „Фејсбук“ се приклучени 941.240 граѓани или 45,2 проценти.
Според податоците на специјализираниот статистички веб сајт „Интернет ворлд стат“, Македоците во користењето на интернет се пред Албанците, Бугарите, Грците, Црногорците, Србите и граѓаните на Косово.
Процентуално гледано по Македонците најголеми корисници на интернет се Србите со 56,4 проценти по кои следуваат Грците со 53, Бугарите со 51, Црногорците со 50 и Албанците со 49 проценти. Најмалку интернет се користи во Косово каде што 20,5 проценти од населението е приклучено на онлајн мрежата.
Поголем интерес за интернет има кај граѓаните на Хрватска, Словенија и Босна и Херцеговина. Од нив, најмногу интернетот се користи во Словенија каде што 72,1 процент од населението се приклучени онлајн, по што следува Хрватска со 70, 7 проценти и Босна и Херцеговина со 60 проценти.
Најпознатата социјална мрежа „Фејсбук“, повеќе од Македонците ја користат Србите – 48,2 проценти од вкупната популација и Црногорците со 46,9 проценти. Помалку приклучени на „Фејсбук“ има во Словенија – 37,1 процент, Албанија – 36,1, Хрватска – 35,1, Бугарија – 34,6 и Босна и Херцеговина со 33,7 проценти.
Зголемувањето на интернет корисници во Македонија се должи пред се на политиките и реформите што беа спроведени во последните години почнувајќи од отворањето на бесплатни интернет клубови, организирањето на бесплатни курсеви за граѓаните, доделувањето ваучери за компјутерска опрема за студентите па се до набавката на компјутери за училиштата и воведувањето на електронскиот систем скоро во сите државни и јавни институции.
Податоците од Државниот завод за статистика на Македонија од октомври годинава покажуваат дека во првото тримесечје од годинава 58,3 проценти од домаќинствата имале пристап на интернет што е пораст од 3,3 проценти во споредба со истиот период 2011 година. Од вкупното население на возраст од 15 до 74 години компјутер користеле 59,9 проценти, а интернет 57,5 проценти. Како најголеми корисници на интернет се јавуваат учениците и студентите.
Кај деловните субјекти 87,3 проценти имале пристап на интернет, а приближно една четвртина или 25,5 проценти им обезбедиле на своите вработени преносливи уреди со кои се овозможува мобилна конекција на интернет.
Минатата година 84 проценти од компаниите користеле интернет за соработка со органите на јавната власт било за добивање информации, формулари или пак за административни процедури, а околу 28 проценти понудиле стоки и услуги во електронските системи за јавни набавки во државата.
Во последно време се повеќе се користи и е-трговијата од страна на граѓаните и компаниите. Статистичките податоци на Државниот завод за статистика укажуваат дека во текот на минатата година 8,9 проценти од компаниите купувале или продавале стоки и услуги преку компјутерски мрежи.
Истражувањето на „Интернет ворлд стат“ покажува дека во светот има 2 милијарди 405 милиони и 518 илјади корисници на интернет од кои 937 милиони 169 илјади се приклучени на социјалната мрежа „Фејсбук“. Во Европа од вкупно 518 милиони 512 илјади интернет корисници свои профили на „Фејсбук“ имаат 243 милиони 230 илјади жители. Во топ 10-те интернет држави во Европа според овој веб сајт рангирани се Русија, Германија, Велика Британија, Франција, Турција, Италија, Шпанија, Полска, Холандија и Украина.