Социјалната мрежа „Фејсбук“ од вчера се придружи на „хаштаг“ револуцијата и го воведе симболот „#“, што се користи на „Твитер“ и овозможува собирање на корисниците околу некое име или тема.
Воведувањето на „хаштаг“ на корисниците на најпопуларната мрежа ќе им овозможи учество и водење групни разговори, како и едноставно пребарување на новости поврзани со истите теми.
„Хаштаг“ најмногусе поврзува со „Твитер“, но го користат и останатите социјални мрежи како што се „Тумблр“ и „Пинтрест“.
Минатиот месец и „Гугл“ најави негово воведување на својот сервис „Гугл+“.
„Фејсбук“ на својот блог објави дека со воведувањето на „хаштаг“ сака да се олесни меѓусебната комуникација на корисниците.
– Секој ден стотици милиони луѓе го користат „Фејсбук“ за споделување на своите размислувања за битни настани околу нас и разговарање за истите со своите пријатели. Со цел подобро да се истакнат најинтересните разговори за настаните, луѓето и темите воведуваме повеќе нови функции, објави менаџерот на Фејсбук, Грег Линдлеј.
Од вчера корисниците на „Фејсбук“ може да кликнат на „хаштаг“ и да ги видат сите објави на другите луѓе на одредена тема.
Новата услуга за почеток ќе биде достапна само за 20 проценти од корисниците, а останатите „хаштаг“ ќе може да користат во текот на следните неколку недели.