Цената на пивото на овој прочуен фестивал во последната деценија пораснала за 43%, па така просечната цена за литар пиво на овогодинешниот „Октоберфест“ ќе изнесува 9,35 евра, што е за 0,35 евра поскапо од лани. Бидејќи во текот на фестивалот се продаваат околу 7,5 милиони литри пиво, тоа значи дека организаторите само од разлика на цената ќе инкасираат повеќе од 2,5 милини евра.
Има најава дека една асоцијација ќе иницира потпишување на петиција како притисок врз организаторите за намалување на цените на пивото.
„Бараме највисоката цена на пивото да биде 7,10 евра за литар“ рече Јан Улрих Битлингер, претседател на асоцијацијата.
Кампањата ќе започне на 22 септември, денот на отварањето на 16- дневниот фестивал. Од асоцијацијата се надеваат дека ќе соберат 30-40 илјади потписи колку што е потребно за одржување на официјален референдум. Исто така дел од барањата ќе биде и ограничувањето на годишното зголемување на цената на пивото да не биде поголемо од 0,15 евра.
Организаторите покрај петицијата имаат уште еден проблем. Имено заради зголемената потрошувачка на пиво ова лето, предизвикана од тропските горештини, пивниците немаат доволно шишиња и буриња за потребите на фестивалот.
„Драги жители на Минхен, вратете ни ги шишињата и бурињата. Ни требаат“ испрати апел менаџерот на пивницата „Paulaner“ и „Hacker Pschorr“.
