Британскиот јавен радиодифузен сервис Би-Би-Си соопшти дека во наредните три години планира да инвестира 44 милиони долари во креирање на содржини за деца, чија цел ќе биде нивно одвраќање од Нетфликс, Јутјуб и Амазон.
Би-Би-Си има намера да креира онлајн содржини за деца како што се видео клипови, квизови, игри и апликации, кои ќе бидат надградувани, обновени од нивните архиви или преземени од други квалитетни образовни и културни тела.
Кога станува збор за телевизијата, новите детски програми ќе се емитуваат на канали како што се Би-Би-Си Бајтсајз за едукација на деца постари од пет или шест години или за забава на деца помали од шест години.
Би-Би-Си влегува во овој нов проект откако од нивниот годишен извештај заклучија дека Јутјуб станал најсакан бренд меѓу 70 отсто деца од шест до дванаесет години. Британската мрежа се бори да остане релевантна во развојот на нивниот дигитален простор.