Американскиот актер Ал Пачино изјави дека додека се подготвувал за улогата на Фил Спектор во филмот за него, одлучил да не се запознае со познатиот музички продуцент и осуден убиец, а оти подоцна сфатил дека со години наназад го познава.
Еден пријател му покажал 20 години стара фотографија на која е прикажан актерот како стои покрај Спектор. Пачино, пак, тврди дека на тој момент овековечен на фотографијата воопшто не се сеќава.
Премиерата на филмот „Фил Спектор“ се очекува во март. Филмот се занимава со односот на Спектор со неговата адвокатка Линда Кени Бајден, која го претставуваше на првото судење на кое е обвинет за убиство на актерката Лана Кларксон, Судењето е поништено, но Спектор на второто судење е осуден и сега отслужува казна од 19 години до доживотен затвор.
Ал Пачино изјави дека не сакал да се запознае со Спектор во затворот, бидејќи тој е поинаков човек од оној кој го глуми во филмот, кој се уште не е осуден за злосторството.
– Не знаев ништо за него, освен дека е одговорен за извонредна музика и оти е вмешан во овој чуден случај, рече Пачино.