Владиката на повардарската епархија, Агатангел, беше еден од најгласните во протестите против општина Центар, за наводното уривање на црквата во Скопје, иако се покажа дека таков план воопшто немало, а целата гужва беше создадена за партиското седиште на власта кое тогаш не беше почнато да се гради и можеше да се стопира со измена на планот.
Сега, кога државата одзема црковно земјиште во Љубаништа за бизнис зделки, истиот владика и тие што беа со него на протестите, молчат.
Ниту излегоа, ниту кажаа дали се противат на одземањето на црковното земјиште за багателна и смешна сума пари да му се даде на „странски инвеститор“ да гради на тоа место хотел и казина.
Единствен кој го крена гласот е митрополитот на дебарско-кичевската епархија, Тимотеј.
Црквата веќе доби решение со кое се експроприра земјиштето со површина од 18 хектари која Дебарско-кичевската епархија нема намера да ја продава и затоа го обжали решението пред Управниот суд, кој пресуди во корист на власта. Таков исход очекуваше Тимотеј, за земјиштето за кое владата понуди по 2 евра за квадрат.
– Каква одлука ќе донесе Управниот суд. Знаме ние судот чиј е. Не е на Отоманската Империја. Како и да е, ние не сакаме да ни го одземат земјиштето , рече тој уште пред одлуката на судот. Но ниту две ниту пет евра не е реална цена. Ај нека ни дадат тие на нас – еве ние сме подготвени да купиме ист квалитет на таква земја, на исто такво поднебје да ја купиме ние по истата цена која тие на нас ни ја даваат. Како и да е основно е дека ние не сме заинтересирани за продажба, изјави Тимотеј.
Иако претхдно од „Сахара груп“ кажаа дека Субрата Рој се откажал од црковното земјиште од религиозни причини, а потоа стана јасно дека и целиот проект пропаѓа, зачудува упорноста на владата да го одземе земјиштето кое е во сопственост на црквата, а од проектот во моментов не постои ништо.
Има неофицијални информации дека е договорен „нов инвеститор“ од друг континент кој наскоро ќе пројави интерес за градење на комплексот во Љубеништа, но и се повеќе сомнежи за тоа кој навистина стои зад оваа бизнис зделка.
За одземањето на земјиштето не се произнесе ниту „Веритас“ здруженито кое не е регистрирано, но беше гласно во одбрана на црквата.
Колку бизниси ќе правите на местото на црквата? – беше една од паролите кои ги носеа и извикуваа на протестите пред општината Центар, но сега „бранителите на црквата“ никаде ги нема.