Здружението на новинарите на Македонија (ЗНМ) ги осудува нападите на новинарот Александар Тодевски и камерманот Владимир Желчевски од А1Он.
– Очекуваме МВР брзо да ги идентификува насилниците и да поднесе соодветни пријави, а судот најостро да ги санкционира, се наведува во соопштението од ЗНМ.
Насилството врз новинари, како што посочуваат од ЗНМ, претставува најсериозен атак на слободата на медиумите и негирање на фундаменталното право на јавноста да биде информирана. Од ЗНМ го повикуваат лидерот на ВМРО-ДПМНЕ Никола Груевски, јавно да го осуди вчерашниот напад врз новинарите.
– Во знак на револт поради зачестените напади ги повикуваме сите новинари да не известуваат од вечерашниот протест на иницијативата „За заедничка Македонија“. Во иднина нашиот став во врска со покривање на овие настани ќе зависи од подготвеноста на организаторите и на МВР да обезбедат услови за работа на новинарските екипи, се наведува во соопштението од ЗНМ.