Заменик-министерот за надворешни работи Андреј Жерновски се сретна со високиот комесар за национални малцинства на ОБСЕ, амбасадорот Ламберто Заниер, кој престојува во дводневна посета на Република Северна Македонија.
Жерновски, како што пренесува Министерството за надворешни работи, истакнал дека државата ќе продолжи активно да работи на почитување на правата на сите етнички заедници.
Двајцата соговорници размениле мислења за активностите во сферата на унапредувањето на правата на припадниците на немнозинските заедници, имплементацијата на Охридскиот рамковен договор, но и за најактуелните прашања на агендата на ОБСЕ.
Заменик-министерот Жерновски информирал за реформските активности насочени кон интеграцијата во НАТО и ЕУ, за изгласаниот Закон за заштита од дискриминација, за подготовката на новата Стратегија за едно општество за сите, како и за постапката на формирање на новото Министерство за политички систем и односи меѓу заедниците.
– Интеграцијата во НАТО и ЕУ не обединува и по етничка основа, го прави нашето општество посилно, а нашите институции постабилни. Овој проект е далеку поважен од меѓупартиските битки бидејќи претставува влог за просперитетна и стабилна иднина за сегашните и идните генерации, истакнал Жерновски на средбата.