Градоначалникот на општина Центар, Андреј Жерновски, на својот ФБ профил, објави став за специјалниот јавен обвинител, кај кого е клучот за победа на опозицијата на предвремените парламентарни избори во април 2016.
Еве што напиша Жерновски:
Клучот за победата на опозицијата на следните избори лежи во специјалниот јавен обвинител и неговата улога во претстојниот период. Доколку нему му се обезбедат соодветни соработници, како и услови за непречено, професионално и ефикасно вршење на својата работа, тој низ повеќе процеси може да го потврди и процесуира криминалот од објавените разговори.
Досега не сме биле сведоци на ниту еден започнат судски процес против челниците на ВМРО ДПМНЕ и Груевски, па доколку тоа се случи, може слободно да сметаме на крај на владеењето на Груевски и дефинитивен пораз во април следната година.
Околу ова ќе се кршат копјата во септември и токму оваа точка може да биде првата сопка на реализација на договорот.
Затоа, отворено ја повикувам меѓународната заедница, будно да го следи целиот процес, но со посебно внимание да ги надгледува преговорите околу изборот и работата на специјалниот јавен обивнител. Јас лично очекувам сериозни опструкци во работата на обвинителот, кои ќе мора да бидат нотирани од ЕУ и навремено отстранети. Опозицијата, исто така, не смее да дозволи уште еден трик и маниуплација на Груевски, кој, како и секогаш, во јавноста ќе глуми конструктивност и посветеност, додека во позадина ќе направи се’ да се спаси од праведен судски процес.
Да не заборавиме, оваа криза настана токму поради тоа што Груевски и неговите беа фатени во тежок криминал. Треба и мора да се покренат обвиненија, почнувајќи од нелегалното прислушување, тешките злоупотреби на власта, криминалните тендери, корупцијата, па се’ до прикривањето на убиства.
Со договорот на кој тој стави потпис, а го гарантира ЕУ, специјалниот обвинител мора ова да го процесуира. Само така ќе започне толку неопходнот процес за враќање на довербата во системот и неговите институциите.