По 4 години работа на локално ниво, Андреј Жерновски одлучил активноста да ја префрли на централно ниво и затоа, изјави, разговарал со премиерот Заев.
„Таа одлука ја донесовме заеднички. Овој градоначалнички мандат никогаш нема да го заборавам. Тоа беше мандат исполнет со турбуленции, притисоци, уцени. Тоа беа најтешките, но и најубави години во мојот живот“, рече Жерновски, заблагодарувајќи им се на жителите на Центар.
Посочи дека тој и неговиот тим се гордеат со постигнатите резултати.
На прашањето дали приврзаниците ќе ги повика да гласаат за кандидадот за СДСМ, Жерновски одговори дека се уште не знае кој ќе биде кандидадот за Центар.
„Без разлика кој ќе биде кандидат, приврзаниците ќе ги повикам да гласаат за опцијата која носи добро во Република Македонија и мојата одлука да работам на централно ниво е затоа што ги гледаме сите оние промени што настануваат во Република Македонија. Македонија конечно оди напред. Таа поддршка oд центарци никогаш нема да ја заборавам и останувам отворен секогаш за контакт со моите сограѓани. Секогаш кога ќе можам ќе помогнам. Договоривме со премиерот да помагам во работата на идниот градоначалник. Тој секако ќе си има своја програма, но и со моето искуство и проектите кои ги започнавме и се гордееме, да продолжат понатаму“, рече Жерновски.
Жерновски и Заев не разговарале конкретно на која позиција ќе оди, како што самиот рече, слуша разни шпекулации, само разговарале да земе учество во централната власт.
„Сметам дека можам да помогнам со моето искуство, затоа што имам искуство и од таа власт. Се надевам дека тоа ќе биде успешна промена, затоа што локалната власт секогаш ќе ми остане во срце и не кријам дека можеби некој ден повторно ќе бидам на ваква или на некоја слична фукнција“, рече Жерновски.
Како што посочи, во Македонија има сериозен исчекор. За прв пат на избори гласаа Албанци, Турци, Роми, за, условно кажано, една етничка македонска партија. Тоа, според Жерновски, е потребната и неопходна формула за просперитетна иднина за Република Македонија.