Очекуваното траење на животот на населението во земјава изнесува 74,81 г., или жените живеат 77 години, додека мажите 72,7 години.
Државниот завод за статистика, по повод Денот на здравјето, 7. април, направи избор од демографските податоци и показатели за следење на состојбите на јавното здравство и здравствената заштита.
Во 2011 година сме имале младо население (0-14 години) 17,3 проценти, додека старо население (65 и повеќе години) имало 11,8 проценти. Промените во старосната структура на населението влијаат и врз бројот на умренитe лица во државата.
– Бројот на умрените во 2011 година е зголемен за 1,8 отсто во однос на претходната година и изнесува 19.465. Просечната возраст кај умрените мажи е 69,9 години, а кај жените е 74,4 години, стои во податоците на Заводот за статистика.
Според информациите од Заводот, најчести причини за смрт се болестите на циркулаторниот систем, кои предизвикале смрт кај 59,2 % од умрените. Потоа следува ракот кој усмртил 18,2 % од умрените па болестите поврзани со метаболизмот и жлездите.
– Во Република Македонија, во 2011 година, 89,1 проценти од населението имале пристап до примарната здравствена заштита, што е за 3,6 отсто помалку во однос на претходната година – велат од заводот.
Според последните податоци од Институтот за јавно здравје од 2010 година, во земјава има 2,7 лекари, 1 стоматолог и 4,6 болнички постели на 1.000 жители.