Од Брегзитот за кој жалиме произлезе и нешто добро, а тоа е поголема решителност и обединување на останатите 27 земји членки. Земјите од Западен Балкан треба да направат рефлексии за својот развој имајќи, јасна перспектива за членството во ЕУ кое носи придобивки, но и одговорност, порача евроамбасадорот Самуел Жбогар на панел-дискусија во рамки на одбележување на 60-годишнината од потпишувањето на Римскиот договор, организирана од Европското движење во Република Македонија.
Тој нагласи дека ЕУ е заедница на вредности и принципи како што се демократијата, владеењето на правото, човековите права, солидарноста и оти визијата за Европа на основачите на Унијата, како уникатен проект, се однесува подеднакво како земјите членки така и за идните членови на ова семсјтво. Во однос на Македонија посочи дека ЕУ е тука од 1991 година и има вложено милиони евра со кои ја помага подготовката на земјата за членство во Унијата.
– Мнозинството од луѓето го препознаваат тоа и затоа гледаме дека има многу голема поддршка за членството на земјата во ЕУ. Колку поскоро тоа се случи толку подобро. Очекуваме односите со земјите од Западен Балкан да се енергизираат по посетите на еврокомесарот Хан, високата претставничка Могерини и претстојната посета на преседателот на Европскиот совет Туск, рече Жбогар.
Во однос на европските предизвици рече тоа е дилемата суверена Европа наспроти суверени нации и нагласи дека не постои контрадикторност, бидејќи и со Деклрацијата од Рим, деновиве беше испратена порака дека само обединетата и суверена Европа може да гарантира независност за секоја нација.
– Клучот за нашата иднина е обединетата и суверена Европа, истакна Жбогар.
Со оваа панел-дискусија ЕДРМ ја продолжува традицијата на водење дебати за ЕУ и евроинтеграциските процеси на Република Македонија, употребувајќи интелектуален дискурс.