Во Општина Аеродром е планирано проширување на ул. Васко Карангелески, а со тоа и сечење на голем број на дрвја што таму постојат со децении. Наместо да го заштитиме зеленилото во најзагадената скопска општина, локалната власт продолжува со зголемување на автоцентричноста на населбата и намалување на зеленилото што е премногу потребно таму се вели во соопштението од Зелен Хуман Град.
– Вчера, кај обележаните дрвја за сечење кај ул. Васко Карангелески стигнала механизација, а од утре ќе се почнело со проширување на улицата. ЗХГ нема да дозволиме уништување на белите дробови на еден од најзагадените градови во светот. Локалната власт во заминување ветуваше зелени површини, а наместо тоа донесе уште поголема бетонизација и сечење на дрвја. За да биде лицемерието поголемо, новиот кандидат за градоначалник на Аеродром од СДСМ кажува дека ќе се грижел за зеленилото, за зеленило што ќе го исече неговата партија ли ќе се грижи? Ги повикуваме сите граѓани кои не сакаат да живеат во бетонски град да дојдат денес (22-ри септември) во 10 часот спроти ОУ. Љубен Лапе до Воениот базен заеднички да го сопреме уништувањето на уште еден ред зеленило во градот, велат од Зелен Хуман Град.