Генералниот секретар на СДСМ, Миле Зечевиќ, денеска ги продолжува интензивните теренски активности во повеќе градови и населени места, на средби со граѓаните, членовите и симпатизерите на партијата.
На работен состанок со членовите од општинската организација во Кичево Зечевиќ зборуваше за државничките политики на СДСМ за иднината на земјата но и за економските мерки за ублажување на последиците од глобалната енергетска и економска криза.
-Сите живееме во тешко време и последици од глобални кризи и светски текови. За државата е добро што во овие турбулентни времиња кормилото е во рацете на СДСМ, партија која со државнички одлуки ја обезбедува македонската иднина во ЕУ и социјалдемократски економски политики како одговор на кризата. Тоа се двете клучни линии, столбови. Едниот, кој значи одлуки за продолжување на европскиот пат на земјата и подобра иднина за македонските млади генерации и вториот антикризни мерки за ублажување на последиците од глобалната криза. Само во последните неколку месеци 760 милиони евра одвои владата предводена од СДСМ за помош на граѓаните и компаниите. Тоа е големината на СДСМ, државнички одлуки за иднината и економски политики за сегашноста, рече Зечевиќ.
СДСМ, додаде Зечевиќ, е интензивно присутна на терен, со граѓаните, со членовите, посочувајќи ја и големата посетеност на трибините „Силно и одлучно кон иднината“ како порака за исправноста на државничките политики и поддршката на граѓаните.