Заврши меморијалниот спортски турнир „Миле Јаневски Џингар“ во Македонска Каменица, на кој изминатиов месец на спортските терени се натпреваруваа екипи и поединци од повеќе спортски клубови од општина Македонска Каменица.
Организаторите на турнирот, КИЦ Романса и Општина Македонска Каменица, на денешната завршна прес-конефернција истакнаа дека се задоволни од прикажаниот квалитет на екипите и поединците.
Витан Јовановски, еден од органзаторите, потенираше дека во споредба со минатата година оваа година имало помал број пријавени екипи на турнирот, но сите покажале одличен квалитет.
– Турнирот помина во најдобар ред, имаше добри екипи и голем натпреварувачки дух, но и голема посетеност од публиката. Во мал фудбал се натпреваруваа шест екипи, во ракомет три, во кошарка пет во машка и четири во женска конкуренција, а во поединечни спортови пинг-понг и тенис имаше 16 натпреварувачи. Присуството беше масовно, а конкуренцијата беше појака. Турнирот е само општински, а организацијата е со намера да се поттикнат спортските клубови и да си ги измерат меѓусебе силите, рече Јовановски.
Гоце Стојановски, директор на КИЦ „Романса“ потенцираше дека традиционалниот меморијален турнир годинава беше збогатен со натпреварувачи за пинг-понг и тенис.
– Целта на организација на овој турнир кој секоја година се проширува со нови спортови е да се придонесе кон развојот на спортот во општината. Сега, откако спортистите и клубовите во Македонска Каменица имаат и своја куќа на спортот, имаат тениски игралишта, спортска сала, како и фудбалско игралиште, создадени се одлични услови за развој на спортот и привлекување на младите кон спортот, рече Стојковски.
Тој додаде дека победниците на овогодинешниот турнир ќе добијат наградно патување во Охрид, кое е спонзорирано од општина Македонска Каменица.
Инаку, во мал фудбал победник е екипата „Делириум“, „Клиф оф Мохер“ во баскет во машка конкуренција, во женска конкуренција баскет победник е екипата „Ресторан Шизик“, а во ракомет „Романса“ го освои женското ракометно финале. Шампион во пинг-понг е Антонио Димитровски, во тенис Дарио Стојковски и Анастасија Стојковска.
Меморијалниот спорстки турнир се организира десет години, а е посветен на бранителот Миле Јаневски Џингар, кој во 2001 година загина кај Вејце.