Со огномет, импровизиран напад и посета на историската поставка од НОБ изложена во Участакот, Прилеп и годинава во предвечерието на големиот национален празник 11. октомври го започна чествувањето на празникот.
Настанот беше збогатен со ликовна изложба, а на сцената на камената бина присутните имаа можност да уживаат во изведбата на солистите од детскиот хор „Мали анѓели“, прекрасниот концерт на етно групата Синтезис и настапот на ДЈ Мето.
Прилеп утре ќе им оддаде почит на жртвите на фашизмот, на борците на Могилата на непобедените и Алејата на народните херои во Паркот на револуцијата. Делегации на борци, локалната самоуправа, политички партии и граѓани ќе положат свежо цвеќе и пред спомениците на Кузман Јосифоски – Питу и Методија Андонов Ченто. Празникот ќе продолжи во текот на целиот ден со изложба на рачни изработки „Килимијада“ , „Car Show“ на кое пред публиката ќе бидат изложени над 300 возила од цела Македонија и фестивал на медот.