Во кривичниот суд во Скопје денеска треба да продолжи судењето за случајот „Поткуп“ во кој обвинет е премиерот Зоран Заев. Претходното рочиште беше одложено на барање на јавен обвинител кој го известил новиот судија во предметот, Дарко Тодоровски дека не може да присуствува на рочиштето.
И претходно рочиштето исто така беше одложено, бидејќи предметот не беше пристигнат од Апелацискиот суд, кој требаше да одлучи по жалбата на одбраната на Заев, која побара видеоснимките од посебните истражни мерки да не бидат користени како доказ во судската постапка за случајот „Поткуп“, затоа што делови од неа беа јавно објавени на видео-сервисот „Јутјуб“.
Апелациониот суд во Скопје донесе одлука со која образложи дека судијката Дијана Груевска Илиевска, која му судеше на премиерот Зоран Заев, незаконски донела одлука снимката од посебните истражни мерки да се употребува како доказ. Судијката откако го добила предлогот, требало одлуката да ја донесе на рочиштето и за неа да гласа советот. Но, наместо тоа, таа самостојно, надвор од рочиштето, одлучила снимката и понатаму да се користи како доказ. Апелациониот суд ја поништи нејзината одлука и случајот го врати на повторно одлучување.
Заев во случајот „Поткуп“ е обвинет дека како градоначалник на Струмица барал поткуп од приближно 160 илјади еевра од струмичкиот бизнисмен Иван Николов Сачевалиев за легализација на градежно земјиште.