Градоначалникот на Струмица, Зоран Заев, денеска ја промовираше изградбата на локалниот патен правец меѓу селата Банско и Моноспитово, кој заеднички го градат општините Струмица и Босилово.
Делот кој се гради на територијата на општина Струмица е во должина од 897 метри и се финансира од средства од буџетот на општината во износ од седум милиони и осумдедесет и седум илјади денари, а 1 милион и 413 илјади денари се обезбедени од Бирото за регионален развој и 170 илјади денари се обезбедени од Центарот за регионален развој. Изградбата на патот на територијата на општина Босилово се финансира од Светска банка и дел од буџетот на општина Босилово.
-Јас сум денеска тука за да ја обелодениме реализицијата на овој многу значаен патен правец за граѓаните на двете општини, но верувам и пошироко како регионален пат, од проста причина што не сакам да се доведам во состојба повторно ваква категорија на пат да пушта Груевски, бидејќи тука се трошат 7 милиони и 87 илјади денари, исто колку што се потрошија за последниот патен правец и тоа се средства на граѓаните на општина Струмица. Овде имаме дел од Бирото за регионален развој, секако која што е државна институција. Но, во моменти кога не се спроведува законот за рамномерен регионален развој и кога сите вакви патишта треба да се финансираат според овој закон, општините се принудени да трошат огромни средства од своите локални буџети. Инаку, овој патен правец е многу значаен, бидејќи поврзува многу културно-историски споменици, многу природни убавини-тука се водопадите, топлите води и секако Моноспитовското блато и сето тоа со изградбата на овој пат претставува одлична можност за развој на туризмот, а секако и за подобра комуникација на граѓаните, рече градоначалникот на Струмица, Зоран Заев.