Општина Струмица се приклучи кон Конвенцијата на градоначалници во Брисел, основана од Европската комисија, а со цел вклучување на локалните власти и граѓаните во развојот и имплементацијата на енергетската политика на Европската унија. Градоначалникот Зоран Заев денеска ја потпиша Конвенцијата врз основа на одлуката за прифаќање на членството на општина Струмица за приклучување кон Конвенцијата на градоначалници во Брисел што ја донесе Советот на општина Струмица.
Конвенцијата која од страна на Европската комисија е основана во 2008 година се состои од обврска на земјите и градовите потписнички да одат подалеку од целите на ЕУ за намалување на емисиите на јаглероден диоксид преку мерки за енергетска ефикасност и активности поврзани со обновливите извори на енергија и еколошки чистиот транспорт.
Со потпишувањето на Конвенцијата, општина Струмица се обврзува да изработи акционен план за одржлива енергија, да доставува извештај за спроведувањето најмалку на секои две години, во соработка со Европската комисија да организира денови на енергијата овозможувајќи им на грѓаните директно да ги користат можностите и предностите кои им ги нуди поразумното трошење на енергијата и активно да учествува во работата на годишната конференција на градоначалниците за одржлива енергија на Европа.