„Рекет“ е силен тест за судството и успех во правосудните реформи. Со решавање ма овој случај и Законот за Јавно обвинителство ќе ја докажеме независноста на судството и борбата против корупцијата. Со овие уверувања го пречекавме и ќе го испратиме претседател на Европскиот совет, Доналд Туск, рече премиерот на Македонија, Зоран Заев.
Тој изрази искрена надеж дека на самитот на ЕУ закажан за во октомври годинава, Македонија дефинитивно ќе добие датум за преговори.
Премиерот Заев истакна дека Туск е голем пријател на нашата држава, кој не пропушта ниту една прилика да застане зад Македонија во однос на влезот во ЕУ и проширувањето на Унијата.
„Ова взаемно пријателство да го крунисаме во октомври. Ова е период од најголема важност за постигнување на стратешките цели, а тоа е потврдување на датумот за преговори за пристап во ЕУ. Имаме засилен ангажман за обезбедување поддршка од сите земји членки. После десет позитивни препораки и резултатите кои ги постигнавме, сме повеќе од убедени дека на седницата на ЕУ на 17-ти и 18-ти октомври ќе добиеме датум за преговори“, рече Заев.
Премиерот на заедничката прес-конференција истакна дека на денешната средба детално го запознал Туск со се што оваа Влада направила изминатите години.
„Очекуваме Советот да направи рамка за датумот за преговори. Целосно е јасно и нема сомневање дека преку трансформација патуваме кон членство во ЕУ. Ова значи интензивна работа согласно политиките на Унијата која е незаменлива алатка, што прави успешни приказни во европските земји“, додаде Заев.