Задната страна од црквата Св. Софија во Охрид, за жал и натаму служи како собиралиште на хулигани. Поставувањето на оградата околу црквата пред скоро време не ги спречи несовесните граѓани и гости во Охрид да го сквернават еден од најстарите божји храмови во Охрид.
Жителите кои живеат во близина на црквата неколку пати реагираа на лошата глетка каде секојдневно поминуваат граѓани и туристи.
Ова не смееме повеќе да го дозволуваме, а ни се случува и за големите христијански празници кога голем број верници се присутни во нашиот град за големиот христијански ден – реагираат жителите кои живеат во близина на еден од најзначајните знаменитости во Република Македонија.
Тие додаваат дека и покрај оградата за да се зачува црквата, западната фасада од црквата Св. Софија и понатаму претставува јавен тоалет и ноќно собиралиште на хулигани. Апелираат до црковните служби да преземат мерки за заштита на овој простор и да го заштити еден од најзначајните верски храмови во државата.
