Во матичното собраниско тело, Комисијата за здравство, копјата ќе се кршат по Предлог законот за прекинување на бременост.
Се најавува лекари, експерти и претставници на невладиниот сектор да дебатираат кои се аргументите за , а кои против едно вакво законско решение.
Со ова започнува јавната расправа за Законот, кој предизвика лавина спротивставени реакции.
Граѓанската организација Х.Е.Р.А преку социјалната мрежа Фејсбук за четврток во 11.30 часот, најавува нов протест против овој закон.
Тие сакаат да испратат порака до Парламентот да не дискутира за овој закон, како и до Министерството за здравство, како предлагач, да го повлече законот.
„Овој закон ниту е истиот како оној од ’77, ниту ќе го подобри здравјето на жената. Токму напротив овој закон само ќе ги ограничи жените во слободно донесување на својата одлука за прекинување на бременоста. Овој закон не е подготвен во транспаретна процедура, а најмалку се прашани они на кои се однесува – жените. Дојдете да ја пратиме заедно јасната порака до Собранието да не дискутира за овој закон и Министерството за здравство, како предлагач да го повлече овој закон“, се вели во повикот за протестот.
Лош ветер дува низ Европа за абортусот, вели организацијата „Меѓународен семеен планинг“ (МСП) и реагира на предлот законот на Владата на Македонија за абортусот.