За да направи корекција во тарифирањето на електричната енергија со кое и преку ден граѓаните ќе имаат евтина струја додека трае вонредната состојба, од Регулаторната комисија за енергетика за „А1он“ велат дека треба да се направат анализи како тоа ќе влијае на крајната цена.
Регулаторите велат дека се во тек со онлајн петицијата за евтина струја додека трае вонредната состојба која е потпишана од 36,5 илјади граѓани.
„Регулаторната комисија за енергетика и водни услуги ги следи континуирано барањата на потрошувачите на енергија, независно дали се поднесени директно во Регулаторната комисија за енергетика или истите се пренесуваат преку медиумите, а посебно на социјалните мрежи. РКЕ очекува од енергетските компании доколку нивните показатели укажуваат дека има технички предуслови за проширување на дневната евтина тарифа да достават анализа во која ќе треба да се покаже како проширувањето ќе рефлектира врз крајната цена“, изјавија за „А1он“ од Регулаторната комисија за енергетика.
Регулаторите сметаат дека воведувањето на евтината тарифа е комплексен процес кој подразбира опсежни анализи од аспект на влијанието од воведувањето на оваа мерка врз целокупниот електроенергетски систем, прераспределба на трошоците коишто настануваат поради тоа, а се води сметка и од аспект на ликвидноста на вршителите на енергетските дејности почнувајќи од производство на електрична енергија, пренос и дистрибуција како и снабдување со електрична енергија по што треба на терен да се направи соодветна адаптација на броилата.
„Воведувањето на евтината тарифа е постапка што бара време да се спроведе доколку се донесе таква одлука. Домаќинствата имаат директни броила коишто се отчитуваат од страна на овластени лица на Електродистирбуција ДООЕЛ Скопје и е потребно е време истите да се прилагодат на соодветни промени, со пристап до секое броило“, објаснуваат од Регулаторната комисија. Онлајн петицијата за воведување евтина струја како мерка за намалување на опасноста од социјална криза и сиромаштија кои би биле последица на вонредната состојба во државата, се појави како иницијатива на граѓани во петокот попладне. Досега ја потпишале 36. 530 граѓани, а бројот на потписници постојано расте. Од Регулаторната комисија велат дека презеле серија мерки и активности во вонредната состојба како резултат на кои компаниите прифатиле да го замрзнат исклучувањето на потрошувачи кои не ги платиле сметките за струја, вода и парно. „Во моментов активно комуницираме со компаниите за да се изнајде модел за да се олесни плаќањето на сметки што ќе стигнат во периодот додека трае вонредната состојба. Апелираме да се искористи максимално дневната евтина ниска цена на електрична енергија“, велат од Регулаторната комисија.