Неуспешниот исход за пронаоѓање компанија што ќе ја реконструира зградата на Владата ја натера Службата за општи и заеднички работи на Владата да објави нов тендер за избор на најповолен понудувач за реконструкција на фасадата и осветлувањето на објектот.
Неокласицистичкото идејно решение на архитектите Жарко Чаушевски и Филип Богатинов, според огласот, ќе може да го изведат и два различни субјекта. Една фирма би ги имплементирала новите фасадни елементи, според стилот на проектот „Скопје 2014“, додека втората фирма би ја изработила „архитектурата со конструктивен систем и илуминација“.
Согласно постоечката документација, површината на објектот ќе порасне од 35.200 на 42.240 метри квадратни и ќе се гради во неокласичен стил.
Компаниите своите понуди треба да ги достават до 22 февруари а како главен критериум за добивање на тендерот се наведува цената.
За зградата да биде во барок, имаше конкурс со понуди од различни стилови, а според она што беше официјално објавено, граѓаните се одлучиле премиерот и дел од министрите да работат во зграда во барок- стил. Авторот на оригиналниот проект за зградата, Петар Муличковски се спротивстави на ова решение на изјави дека се прекршени неговите авторски права.