Во Собранието на Република Македонија денеска напладне ќе биде врачена државната награда „11 Октомври“ – највисоко признание за животно дело во областа на науката, уметноста, стопанството и другите дејности од јавен интерес на Република Македонија.
Годинашни добитници на наградата за животно дело во областа на науката и образованието се пулмологот-алерголог д-р Дејан Докиќ и историчарот проф. д-р Зоран Тодоровски.
Музичарот, педагог и диригент Рамадан Шукри, народниот уметник Вања Лазарова-Димитрова и писателката и академик Катица Ќулавкова се добитници на наградата „11 Октомври“ за животно дело во областа на културата и уметноста.
Одлуката ја донесе Одбор за доделување на наградата под претседателство на академик Митко Маџунков.