Поднесена е кривичната пријава од полицијата против 22-годишниот возач кој вчеравечер ја прегази младата Викторија М. на пешачки премин, а почина на лице место, дознава „А1он“. Според неофицијални извори, возачот Ј.Ѓ. кој управувал со џипот „Циторен Ц4“, исто така е пренесен во скопското Обвинителство. Таму ќе биде извршен уште еден распит од надлежниот обвинител, кој и вчера правеше увид во несреќата.
Обвинителот има две можности, до вечерва кога ќе истечат 24 часа, да го пушти возачот на слобода или од Кривичен суд да бара одредување на мерка притвор. Обвинителството засега молчи, не открива дали се исполнети законските основи за ваква мерка, но и како ќе биде постапено. „А1он“ прашањето го упати уште утринава, но тие не одговорија, туку испратија соопштение дека се проверува што точно се случило.
Во меѓувреме, второто повредено лице, кое било момче на 24-годишната радовишанка е пуштено на домашно лекување. Тој имал набиеници на карлицата, соопшти директорот на болницата каде беше прегледан. Се наоѓа во тешка психичка состојба, видно потресен поради вчерашната трагедија. Во Радовиш, сограѓаните на загинатата Викторија се шокирани од настанот. Со неверување ја примиле веста за нејзината смрт.
Обвинителството ги побара и снимките од надзорните камери, кои се околу пет на раскрсницата. Тие ќе помогнат да се утврди, што точно се случило вчера по 19 часот. Телото на Викторија е дадено на обдукција, по што ќе биде предадено на семејството. Кај возачот кој ја усмрти, направено е вештачење на примероци од урина и крв, за да се увиди дали возел во алкохолизирана состојба или со земена дрога.