Основното јавно обвинителство Скопје до Основниот кривичен суд Скопје поднесе Обвинителен акт за кривично дело – Тешки дела против безбедноста на луѓето и имотот во сообраќајо против возачот кој на 20. јануари годинава ја предивика сообраќајната несреќа во близина на Сити мол во која смртно настрада 24-годишната Викторија Николова, а повреден беше Леонид Даов соопштија од ОЈО.
– Обвинетиот, на 20 јануари, како учесник во сообраќајот на јавните патишта, управувал со патничко моторно возило Цитроен Ц4 по булеварот „Партизански одреди“. Кога дошол до крстосницата со улиците „Московска“ и „Љубљанска“, каде светлосните сообраќајни знаци – семафори во тој момент биле исклучени од програм и работеле со трепкаво жолто светло, тој постапил спротивно на член 19 од Законот за безбедност на сообраќајот на патиштата, односно иако бил должен, не обрнал внимание на пешаците на коловозот. Спротивно и на членот 35 од Законот, приоѓајќи кон обележан пешачки премин, обвинетиот управувал со автомобилот со брзина од 67,3 километри на час, што е за 17,3 километри на час поголема од максимално дозволената, со што бил оневозможен навремено да го запре возилото во случај на потреба. Со предниот дел од возилото удрил во двајца пешаци кои поминувале по обележаниот пешачки премин. Еден од пешаците, девојка на возраст од 24 години, притоа се здобила со тешки телесни повреди и починала на лице место, додека другиот пешак бил повреден и пренесен во болница, се вели во соопштението од Обвинителството.
Јавниот обвинител проценил дека се уште постои опасност обвинетиот да се даде во бегство за да го избегне кривичниот прогон или да го повтори делото, па до Основниот кривичен суд Скопје доставил и предлог за продолжување на веќе определената мерка притвор.