Група деца и неколку вработени од градинката „Тетекс“ во Тетово се во домашна изолација, откако две воспитувачки во градинката се евидентирани како заболени од Ковид-19.
„Не е тоа болест што само во градинките би се проширила, можат и од дома да се разболат, така што досега сме немал поголеми проблеми, освен што едната група ни е во изолација. Двете колешки се во добра здравствена состојба, како и децата од групата на едната воспитувачка, со родителите сме во контакт, тие се добри и не покажале симптоми, вели директорката на општинската јавна установа детски градинки „Младост“, Рамије Даути.
Ова е уште еден случај во низата на воспитувачки во македонските градинки кои се тестирани позитивни на коронавирусот.
Од министерството за труд и социјална политика и од Здравство кажаа дека процесот на згрижување деца во градинките засега ќе продолжи, но доколку има ширење на заразата, можно е да се донесе нова одлука за затворање на градинките.