Иницијаторите за реформи добија поддршка да истраат во борбата за демократизација на партијата од пратениците на првиот парламентарен состав на ВМРО-ДПМНЕ.
– ВМРО-ДПМНЕ да се реформира во демократска партија, а не како што е сега султан-партија. Да се врати на старите победнички патеки. Како пратеници ги поддржуваме реформистите и мора внатрепартиската демократија да биде застапена, а се во интерес на државата и на партијата, рече пратеникот на ВМРО-ДПМНЕ од првиот состав Михајло Пановски.
Денеска е ден на демократијата и сите сакаме демократијата да владее. Бараме нашето ВМРО- ДПМНЕ да биде демократска партија. Очекуваме од овие млади луѓе, без желба да им наштетат на партиските интереси да истраат во борбата. ВМРО-ДПМНЕ да стане повторно водечка сила, рече пратеничката од првиот парламентарен состав Ѓулистана Марковска.
Иницијаторот за реформи во ВМРО-ДПМНЕ, Александар Михајлоски се заблагодари до пратениците од првиот парламентарен состав.
Ова е парламентарниот состав кој ја донесе македонската пролет, кои го изгласаа Уставот, Армија на Република Македонија, паричната единица на Република Македонија и ги постави темелите на Република Македонија. Вие бевте гордост и причина зошто се зачленивме во ВМРО-ДПМНЕ. Сите членови во првиот состав беа чесни луѓе и ги вложија своите капацитети за изградба на државата.
Мене ми е чест што ни давате поддршка, ова е иницијатива која сака да ја врати демократијата во ВМРО-ДПМНЕ, да ги врати нашите партнери во Европа и во САД. ВМРО-ДПМНЕ е втемелено во државноста на Република Македонија, рече Михајлоски.