Општинската организација на Црвен крст од Велес во соработка со Отсекот за превенција при СВР Велес и професионалната протипожарна единица денеска во Младинскиот парк пред ученици од велешките училишта изведоа показна вежба за штетните последи од петарди и други пиротехнички средства.
Веруљуб Додевски, началник на Секторот за превенција при СВР Велес, потенцира дека поради сериозноста на повредите кај децата и младите, апелира до нив да се воздржат и да не употребуваат петарди и други пиротехнички средства, со кои ќе го загрозат своето и здравјето и животи на останатите другарчиња и граѓани.
– Има деца со оштетени раце, прсти. Штетен е и звукот од петардата за оние кои се наоѓаат во близина на детонацијата, тој делува стресно за сите што не ги гледаат, но ги слушаат. Штетно по здравјето е и вдишувањето на микрочестичките од испуканата петарда,потенцира Додевски.
Љупчо Лепидовски, командир на ППЕ од Велес им порача на младите да не фрлаат петарди посебно во затворени простории бидејќи освен загрозување на своето и здравјето на останатите лица може да предизвикаат и пожар.
Од СВР Велес велат дека ваквите превентивно едукативни вежби позитивно влијаат врз децата и младите. Како резултат на тоа, посочуваат, секоја година во Велес пред и за Новогодишните празници се намалува бројот на продадени и употребени петарди и други пиротехнички средства.