Делови од тетовското село Брвеница втор пат за една недела над 12 часа немаат снабдување со електрична енергија. Поради дефект од 23 часот синоќа е во прекин снабдувањето со електрична енергија.
– До кога ќе се си играат со струјата во Брвеница. Пред три дена немаше повеќе од 10 часа, сега пак. Ноќеска на десетина пати се прекинуваше и снема струја со часови. Поради неработење на фрижидерите се расипуваат производите, како во домаќинствата така и во продавниците, се пожалија мештаните.
Од електродистрибутивната компанија ЕВН Македонија велат дека за прекинот во снабдувањето синоќа во 23 часот проблемот е во подземен кабел. Се лоцира со мерна кола, потоа треба да се копа, па да се санира дефектот.
– Во Брвеница настанал дефект на подземен кабел. Екипите на Електродистрибуција се на терен и работат на отстранување на дефектот, информираше портпаролот на ЕВН Македонија Вјоса Селими.
Првиот дефект се случил во вторникот, 11 јули околу 11 часот, а бил отстранет во текот на вечерните часови.