Свештениците на тетовското архиерејско намесништво на Македонската православна црква – Охридска Архиепископија денеска во соборниот храм Свети Кирил и Методиј во Тетово отслужија помен парастос за упокоениот митрополит Полошко-кумановски господин Кирил.
По тој повод и камбаните на храмот бијат на секој час, а знамињата на МПЦ и на Македонија поставени во црковниот двор се на половина копје.
– Дедо Кирил беше меѓу најголемите бранители на Светоклиментовата црква и нејзиниот свет Устав. Не дозволуваше до последниот здив од својот живот ниту едно туѓо влакно или валкана прашина да падне врз животот и делото на МПЦ, ниту на нашата света држава Македонија, рече во своето обраќање старешината на црквата „Свети Кирил и Методиј“ прота Предраг Исаевски.
Во црквата беше отворена и книга на жалост во која се потпишуваат многубројни верници.
– Тој беше човек што беше пример како треба да се сака својата нација, својата црква и сите свои сограѓани, рече членот на Црковниот одбор Ивица Зориќ.
И жителите и верниците од Тетово сметаат дека митрополитот Кирил има дадено голем придонес во формирањето и развојот на црквата.
Утре во 8 часот во соборниот храм „Свети Кирил и Методиј“ ќе биде отслужена заупокоена света божествена литургија.
Митрополитот Кирил 26 години ја водеше Полошко-кумановската епархија во која се опфатени архиерејските наместништва во Тетово, Гостивар, Куманово, Кратово и во Крива Паланка. Тој беше главен потписник од свештенството на Македонија за автокефалност на црквата.