Со интонирање на македонската химна и едноминутно молчење за борците, кои животите ги дадоа за слободна Македонија денеска во Тетово беше одбележан 9 Мај – Денот на победата над фашизмот, во организација на Сојузот на борци од НОБ и антифашистичката војна во Тетово.
Градоначалничката на општина Тетово Теута Арифи и Софија Марија Гирокоу, претставничка на Грчкиот конзулат во Република Македонија учествуваа на манифестацијата на градскиот плоштад во Тетово.
– Тетово е пример за голем европски град што ќе продолжи да ги промовира европските вредности. Тоа што нас не прави европејци се вредостите на толеранција и разбирањето и врз кои се реализира и денешената Европа. Таа ќе останеше сон доколку политичките лидери не го разбраа тоа, рече Арифи.
Гирокоу нагласи дека покрај обединувањето на државите, ЕУ ги обединува и граѓаните. – Делиме ист сон да живееме заедно и да шириме мир, толеранција и просперитет, изјави Гирокоу.
Во рамки на манифестацијата се одржа и ЕУ Панаѓур во кој учениците од основните училишта во Тетово ги претставуваа симболично земјите членки на Европската унија додека во салата на Општинскиот Совет на Тетово ученици од средните општински училишта одржаа симулација на седница на Европскиот Парламент, зборувајќи на 10 јазици, официјални во ЕУ.
Пред Споменикот на револуцијата цвеќе положија делегации на општина Тетово, општинската организација на Сојузот на борци Тетово, тетовскиот гарнизон на АРМ предводена од командантот потполковник Атанас Паноски, Организацијата на резервни офицери Тетово, Здружението на воени инвалиди, ОК на ВМРО-ДПМНЕ, Српската заедница во македонскиот регионален одбор од Тетово, Здружение на македонско – хрватско пријателство, Здружение на пензионери и делегација на Здружението на инвалиди на трудот и корисници на инвалитска пензија Тетово.