Во новата учебна 2018/2019 година во трите средни училишта во Струмица треба да се запишат вкупно 1.611 ученици распоредени во 38 паралелки.
Ова одлука ја донесе Советот на општина Струмица на денешната седма седница.
При тоа во средното образование од општините во Струмичкиот регион ќе бидат опфатени 1.282 завршени полуматуранти и 329 од соседните региони.
Покрај тоа, Советот одлучи да побара воведување нови образовни профили во трите средни училишта во Струмица, а планот за запишување на ученици во прва година во средните општински училишта да го достави до Министерството за образование.
Советниците донесоа одлука за делумно ослободување од плаќање на надоместок за уредување на градежното земјиште за објекти со природни зелени покриви. Тие во последно време се голема потреба за зголемување на урбаното зеленило и за намалување на загадувањето во урбаните средини.
– Освен тоа, зелените покриви можат да апсорбираат и дел од атмосферските води, а со тоа да придонесат и за намалување на ударот на атмоферската канализација при поројни дождови, беше истакното во образложението на одлуката.
Советот едногласно го прифати барањето на градоначалникот Коста Јаневски за доделување еднократна парична помош за новороденче на подрачјето на Општина Струмица во 2018 година во нето износ од три илјади денари.
На денешната седница Советот на општина Струмица донесе одлука за доделување на еднократна парична помош на двајца граѓани, одлука за утврдување на потреба од донесување на урбанистичка планска документација за проширување на плански опфат во катастарски парцели, а даде согласност и за обезбедување на финансиски средства за нови вработувања во ЈП „Паркиралишта-Струмица“ и Библиотеката „Благој Јанков Мучето“.